مسا الخير انا بعتذر عن التأخير بالبوست اليوم بس كان عندي شي كتييييييييييييييير ضروري واضطريت غيب كل النهار عن البيت هلق مش أنو ما كان عندي شي قولو كان عندي من قبل الضو شي وقلت! بس ما حطَّيتو لأن تا حِطّو ناقْصو حَرَكات! مش حرَكات إصطناعيّة مِتل البوتوكس والهَبَل والذكاء الإصطناعي! نو حَركات اللُّغة العربيّة اللي بِعشَقها، بالإذن من نديم. فا مش وارد كنت حِط البوست بلاهُن وإنتَظَرني تا رجِعت حرّكو وحطّو. فوالا.
في واحد ما بعرف شو إسمو الصراحة طِلعلي بخِلِقتي عَبكرة الصُبح انا وعم أشرب قهوتي مدري مين مستَضِيفو وسألو رأيو قال فيّي! بس عرّفو عنّو إنّو شيعي ضد حزب الله!!! وحياة الله بلد العجايِب!
وقام هيدا الشي باض البَيضة!
قال الكبييييير منصور الرحباني مرّة بال ٢٠٠٨ إيّام ما زياد دخَّل إمّو بالسياسة
وقال بتحب نصرالله جاوب الكبير منصور أبعِدوا فيروز عن اوحالِكُم السياسيّة!
عينو قبلما تبيض عراف شو عم تِحكي! أولا صحيح منصور قال هالجِملة، وصحيح بال ٢٠٠٨، بس مش صحيح لزياد!! قالا وقتا للعجايِب اللي هنّي حُلفاءَك وعم يِطِلبوا من فيروز بكل وقاحة ما تروح عا دمشق العاصمة الثقافية وتعيد صح النوم بعد غياب تلاتين سنة عن سوريا! وضاف فيروز بتروح وين ما بدّا وعا سوريا وكل الدني.. أي منصور مع الخَط اللي أنا عم دافع عنّو اليوم. عرِفت كيف يا كبير إنتَ؟ حاج تزوّروا التاريخ إنتَ والطبل نحنا بعدنا هون.
هلق منصور قال هيك بالعَلن رغم إنّو بالخِفِي كان عم يِبعَت إنذارات للجهّة الثقافية اللي داعيِتنا إنّو فيروز ممنوع تقدّم صَح النوم لأنّها سارقة الأعمال هيدا بخصوص الكبير اللي عم تِحكِي عنّو واللي هوّي مش موضوعنا بهالبوست انشالله بالبوست الجايي.
اما تصريح زياد كان بال ٢٠١٤ يعني فارقة معك ٦ سنين مينيموم،
ووقتا تخايَل أنا اللي طلِعت قِلت تركيبات زياديّة وهيدا ياه على فِكرة سبب الخلاف الوحيد بكِل هالعُمر أنا وزياد، لأنّو فعلاً كانت تِركيبة! وما قدرت قطّعها هيك، لأن في تاريخ أهِلنا بالدَق وما فينا نتسلّى ونألّف عليه خبَار قد تُصبِح حقايِق وهيّي مش حقايِق ولا شوَي! لو حقايِق ما كنت قِلت شي بس لأنّها مش حقيقة حسّيتا إفتراء وقِلْت، وهُنا وقع الخلاف بيننا لأن أوّل مرّة بقلّو لاء بالعَلَن ووَقتا عِلِق يركّب عليّي طالِع نازِل تا رِد وما عِدت ردَّيت لأن أنا ما بيهِم، فينا نِلعَب، بس عاصي وفيروز لاء.
هلق صَحيح أنا وزياد كنّا نحِب السيّد، والسيّد أنتِبِه منيح، ما بيِعنِي الحِزب. بس لمِخَّك المَحدُود صعبة تِفهَما هاي.
وبعدين إذا نحنا مِنحِب شي ما ضروري فيروز تكون بِتحِبّو.
أمّا خط المُقاومة ولبنان والجنوب وإسرائيلَك فهاي بِبصِملَك كِلّنا معو عالعِميِاني زياد وأنا وعلى راسنا فيروز وعاصي فهِمتْ؟ هيدي ثوابِت ما بتِتْزَحزَح مع مَزاجَاتكُن ونصايِحكُن السياسيّة المقَلْعَطَة واللي بتِنشَرى وبتِنبَاع بالبورصة.
فهِمت يا عيني؟!؟
أمّا بخصوص فيروز والصَمْت فا أكيد مش إنتَ بدّك تعلّمني إلي أنا كيف وشو إحكي. إنتو عم تدَخّلوا فيروز، تا تسَكْتونِي، أمّا أنا فا إنبَرَى لسانِي أنا وقول أنا بِحكي بإسمي مش بإسم فيروز.
ولمّا كون عَم إحكي بإسم فيروز بصَرّح إنّو بإسم فيروز وبيكون كل شي غَير، من الإطار لتِكتِك لا السَّلامُ علَيكُم. كابّيشْ؟ يللا روح عند أسيَادك الإم تي في والطَبل مُجتَمِعين أَلّليفُوزَانْ من وِشِّي.
الحمدالله الحمدالله وكتّر خيرَك يا ربّي إنّك خلَقتنِي عا صُورتَك
ورُوووومْ أووووووف شو بتِفرُق ما عِندكُن فِكرة!
عن جد رح خبّركُن سِرْ أنا مش طائفيّة أبداً أكادُ أكون الوحيدة بلبنان ما بعرف المِسلِم من المَسيحِي ولا بيهِمّنِي أعرِف،
بَس بَس بَس عِندي حساسيّة عا شي واحد! غريب، هُوّي الموارنِة!
يا أخي مُخْ الروم غير، عامّة عم نِحكي أكيد، بيضَل في إستِثناءَات بالجِهتَيْن. مثلاً طَبْل روم ما بيِفرُق عن طَبل موراني! بس عامّة يعني بالمُجمَل يَعني بتحِسْ الروم غِير، بيِشبَهوا المَسيح أكتر بِيساعُوا الكِل وأكتر.
هيّنة المطران خضر!؟ شو هالعَظيم! شو هالفِكْر! شو هالوَعِي رُغم إنّو مطران! وأنا عِندي حساسيّة عا رِجال الدين، كمان عامّة، بس هالمطران يا أخي، عَقلُو بِيزِين بَلَد! يطَوّل عُمرَك مطرانَّا عا فِكرَك وعَظَمتَك، وعلى وطنِيّتَك! يا ريت يِتعَلَّموا مِنّك بقيّة المطَارِين والله.
هلّق أنا مع لبنان ومع المقاوَمة اللبنانيّة. وإذا هالمُقاومة إقتَصرِت عا حزب الله، بدّي كون مَعها وما ضَرُوري يكون عِندي شَقفِة أرض بالجنوب تا يكون هيدا موقَفِي. أنا كِل الجنوب إلي وكِل أهالي الجنوب أهلي. وبس يِدخُل العدو، كِلّنا إيد وِحدة ضُدُّو يا عباقرة البورنيه.
أكيد منّي مع إسرائيل ولا مَع التُطبيع مع إسرائيل! ولَوْ حزب الله مُضِي أنا ما بُمضِ.ي عرِفتُوا كيف؟؟ هلق بِيفِز واحد يقلّي بس حزب الله فوّتنا بهالحرب. أوكي أنا معكُن فوَّتنا بهالحرب. اي شو يَعني؟؟؟ منقاصِصُو ومِنصِف مع إسرائيل!!!!؟ شو هالمَنطِق العَجيب؟ منقاصِصُو منقاصِصُ الجنُوب!؟ وإلا مِنساعدو وبعدين بس تِخلَص الحرب منحاسبو!؟ يَعني بمَنطِقَك إذا أحَدْ ولادَك غُلِط بِتكِبُّو برّا؟؟؟؟ بِشْ بِشْشْشْ، شو هَالعَظَمة!!!
بِتقولولي الجَيش؟ ما حدا قَدّي مع الجيش. بس عَينُو سلّحوه لهالجَيْش مش بدّو يحارب بالنِقَّيفِة أو بالسَّيْف والتِرْس؟ أنا مش طالعة عن الجيش أبداً! وبِشكُر شباب الحِزب لأن عم يمُوتوا عنّي وعن الجَيش وإلا شو؟ آه لاء إنتو لاء، نسِيت إنّو إنتو أوّل مين حارَب الجَيش وقَتَّل عن بو جَنَب ودَفَنْتوه هوّي وطيّب! سوري كِنت ناسيِة.
إي لأن إسرائيل كانت ناطرة الحِزب تا تفُوت هالفَوْتة، لأن مِش هيّي قَتَلِت بشير ولا هيّي قَتَلِت الحريري ولا هيّي فظَّعِت فينا وضَرَبِت وفاتت بِالطُول وبِالعَرض
ولا هيّي قصَفِت البُور. ولِكْ بس يا جماعة بِشَرَفكُن بس! ما حدا مِنكُن إستَرجَى يقول إسرائيل قَصَفت البُور! ما حَدا! رُغم إنّو هنّي قالوا ولمَّا شافوا هول وحجم الدمار بعد ٢٥ دقيقة بالزبط سَحَبُوا الخبر وإستنكروا كمان وعرضوا خدماتُن!
واذا بدّكُن تعِرفوا الحقيقة الحقيقة، أنا زعِلت من السيّد وما عاد بدّي تابْعو لمّا هو كمان ما قال إنّو إسرائيل! كان لازم يقول!
بس هلّق بِفهَمو، لو قال كان مِضطَر يفوت لمَا بَعد بَعد حَيفا.. ويِمكن كرامِتكُن ما.. ما كان بدّو يوَرِّطكُن. قومُوا ياااااه
في شي إسمو وطنيّة إنتو ما بتَعِرفوه ولا سامْعِين فيه. إنتو ماكسيموم حَرب شَوارِع وخُوَّاتْ وتِشبِيح.
هلق أكيد يا عبد الغني يِمكِن إضْطَر عيش بالرَوْضة ما بس إتغدَّى بعد الحقايِق اللي إضطَرُّوني قُولا.
أكيد عم إمزَح، فَشَر!! على مين بِتِرِكْ البَحِر!؟
أنا باقية وما عندي أدنى شَك إنْ صَار ما صَار القوّات بيدافعوا عنّي!
بخصوص التِشكِيك برواية ليال، تفِه شو زغير اللي شَكَّك!
أنا ما ذَكَرت أسامي، لأن كِلُّن بَطَّلوا مَوجودِين. بس الحمدالله في حدا مِنهُن بعدو موجود، خلّي هو يِرويلكُن. وهالحَدا هوّي صَديق عَتيق وإنسان بِمَركَز كتير مُحتَرم ومهِم.. وخِلافي الوحيد معو كان بال ٢٠٠٦ بعد إجتياح إسرائيل وبعدما نزلتنا من بعلبك دَركَبة، صديق آخر عزيز ماروني لبناني من الموارنة الزامْطين من البورنيه هَدَاني فُولار الحِزب وعلّقتُو بمَسكِة الخزانة بالصالون، شو بِرمِيه!؟ أكيد لاء! أنا مهذّبة مش متل الناس اللي بيِرموا فولارات إءْ
وفات هالصديق القوّات وشاف الفولار المعَلَّق وعينَك ما تشُوف إلا النور! وهي كانِت! مَعركة وجنَان وَلَوْ؟ ما بدَّا هَلقد! وخِلصِت القِصّة.
بس بَعدنِي بحِبُّو وبَعدو صَديق مِن بعِيد لَبعِيدْ.
أُنادِي على الشَّاهِد على حادثة القوّات مع ليال
الصديق إيلي يَحشوشي انشالله ما بُوشِي!
يعطيكُن العافية.
الشمس بتِطْلَع سَودا وِبْييِبَس المَوْج
إذا بفَكِّر إنّو ترابَك مِش إلِي
وشُوما إجا شعُوبْ وشُوما راح شعُوبْ
كِلُّن رح بيفِلُّوا وبيِبقَى الجنوب.
آه يا فيلمون آه ويَمّمّمّا كمانْ
ريما عاصي الرحباني
