شيعت مدينة صور المأسوف فوزي الشعار ابو فوزي الذي قضى نتيجة اطلاق نار استهدفه منذ يومين , حضر التشييع شخصيات سياسية ودينية واجتماعية وأم الصلاة عن روح الطاهرة الشيخ علي حب الله ثم وري الثرى في روضة الزهراء في جبانة صور .
كلمتين ونص :
للأسف اللي صار وعم بيصير وان شاء الله ما يصير بعدين بصور شي محزن كثير …
بتربطني علاقة صداقة بين المتخاصمين …
الله بيشهد انن كلن طيبين من واصف لعلي لفوزي لرامي وما بدي اذكر اسامي اكثر .
هوذي اولاد حارة وحدي ، وجيران وتقاسمو الرغيف والفرح والحزن وحتى الفقر والتعتير …
مين حرضن عبعض ؟
مين بدل بياض قلوبن بالحقد على بعض ؟
مين الو مصلحة يخلي شباب صور الطيبين يقتلو بعضن البعض ؟
الله اعلم …
ليش هيك صار وليش عم بيصير وليش شباب عم تقتل بعض على ولا شي …
صور كبيرة وبتساع الكل .
نفخو بروسن ان المرجلة عضلات وقواص وضرب …
يا عمي بين اولاد الحارة الوحدي المرجلة بتكون لما جارك المعصب منك يضربك على خدك الأيمن بتدرلو الأيسر …
المرجلة تجي تقعد معو وتحاورو وتقنعو ويقنعك وتوصلو لنتيجة : صافي يا لبن !.
خدمت بصور عمر طويل بالدرك والإستقصاء والتحري والمعلومات وبعرف اغلبن … يمكن في عسكر عملو مشاكل معن بالخدمة وبعد الخدمة … انا بقيت محافظ على صداقتي معن. حتى بعز دين مشاكلن … كنت احكي معن وحاول قرب قلوبن على بعض … كانو يسمعولي ويقولو معك حق وخير ان شاء الله ..
اول مبارح التقيت بالصدفة بفوزي ووقفت معو وسلمنا عبعض وحكيني عن مشكلة طلب مساعدتي فيها عند محامية وقلتلو بعد العيد بنلتقي وبنحكي …
بس اجا العيد وفوزي راح …
والله العظيم حرام هيك …
يا عمي والله بعرف القاتل والقتيل هوذي جماعة مساكين كلمة بتاخذن وكلمة بتجيبن ، بس قلبن طيب …
انا لله وانا اليه راجعون الله يرحم اللي ماتوا والله يهدي بقية الشباب ويرجعو يتفاهمو ويكونو ايد وحدي ويرجعو يتشاركو الحزن والفرح والزاروب والبيوت الملزقة حيطانها عبعض …
كثير زعلان اليوم .. زعلان علقاتل والقتيل …
ولازم يكون في حل حتى ما يبقو شباب صور الطيبين يقتلو ببعض .
( الصور – ش.اخبار صور )
