من زمان ومش من زمان كثير بأي ضيعة كان اقل شي يصير عرس او عرسين … شاب وصبية بيتزوجو وبيعملو اسرة …
صالات الأعراس بدك تحجز قبل ب 6 او 7 شهور اذا ما انعمل العرس على البيدر او بساحة الضيعة …
حاليا الصورة مختلفة … اشغال قليلة , الأسعار جهنمية , وما في شاب عم يقدر يبني غرفة ومطبخ وحمام مثل قبل ليفتش على بنت حابة تنستر ويتزوجو …
دارجة بهل ايام كل واحد معو شوية مصاري بينط على الصين او على تركيا بيجيب طناجر لسلق البطاطا , ومقلايات لقلي البيض , واباريق شاي , وركاوي قهوة , وشوية صحون وكبايات , وما هب ودب من علب البلاسيتك شي الو عازة وشي ما الو عازة , وبيجي بيفتح صالة كبيرة وبيعملها افتتاح , وبيقلك بدنا نعمل نهضة وبدنا نتحدى وندعم الصمود ونفتح مجالات شغل للشباب خليها تشتغل وتعيش …
ولك خيي منيح انك عم تفكر بالشباب لكن تفكيرك غلط , انت عم تفكر تبيع وتربح وتكبر ثروتك , لكن الشاب او الصبية اللي عم تعطيهن معاش 200 او 300 او حتى 400 دولار وبيبقو واقفين عإجريهن طول النهار انت مش عم تخدمن , انت عم تدمر مستقبلن , لأنو حتى لو دفعت 500 دولار معاش الموظف هوذي ما بيعمرو غرفة …
بدك تفكر بمستقبل الشباب روح جيب مصنع بيصنع كل اللي عم تجيبن من الصين , اصنعن ببلدك , وظف شباب وصبايا واعملن ضمان صحي , صدر انتاجك على بلاد ثانية هيك بتخدم … هيك بتتحول من بياع طناجر وكبايات واباريق بلاستيك لرجل اعمال ناجح , وبتكون عم تفكر تدعم الصمود وتساهم ببناء الوطن …
موقع قلم حر
