لما اجا البطريرك اي البطريرك ما غيرو على مدينة صور وهو رأس الكنيسة واعلى رئيس ديني بلبنان عند الموارنة ، المسلمين صفوف صفوف نواب ورجال دين سنة وشيعة وهيئات سياسية واجتماعية وجمعيات و و.و.و…راحو استقبلوه … ويا لطيف اللي وقف وتصور معو صورة شو كان مبسوط، فكر حالو تصور مع سيدنا المسيح بحد ذاتو _ هذا شعب الجنوب الطيب المتسامح اللي شرب من نفس المي اللي شرب منها المسيح _
بكل صراحة انا لا نزلت ولا استقبلت ولا بدي استقبل مستقبلا لأني ما بقدر استغشم نفسي خاصة انو البطريرك ولا مرة حسيتو حكي بطريقة جامعة بكل خطاباتو بالكنيسة بعكس كثار رجال دين مسيحيين وحدويين بيحكو كلام جواهر بالكنايس وكلام كثيييير وطني جامع لكل اللبنانية …
من يومين وانا ناطر البطرك انو يحكي شي كلمة مع جماعتو تبعون حزب القوات وخاصة هذي اللي ما بتتسمى اللي طالبت ما حدا يأجر الشيعة الهربانيين من الحرب …
يا خيي احكيلك شي كلمة …
ما بدك تحكي انت ، خلي هل مطارنة اللي حولك يذكرو حزب القوات والكتائب والاحرار والاحزاب المستجدة جماعة تفقيس الماكنات بالمسيح وبالانجيل …
هيك المسيح بيقول ؟
هيك الانجيل بيقول ؟
يا رجل تارك هل فتنجية والطائفيين والمذهبيين يتفطحلو ويتفلسفو بطريقة بغيضة علينا : من ابراهيم الصقر ، لرامي نعيم ، لشارل جبور …من ورا هوذي القرطة صار الشيعي عدو المسيحي …
يا عمي تعا شوفنا نحن بالجنوب كيف عايشين ، عايشين اخوة ،ما بنفرق بين مسلم ومسيحي المسلم بيفوت علكنيسة والمسيحي بيفوت علجامع والحسينية و٣ ارباع اولاد الشيعة بيتعلمو بمدارس مسيحية ، مع اني انا متأكد مليار بال ١٠٠ اذا المسلمين بيفتحو مدرسة بكسروان ما بيجي ولا مسيحي ماروني يتعلم فيها …
يا عمي انا مواطن عادي لا ناقتي ولا جملي بالحروب اكيد بدي حب الحزب والحركة لأني عايش عهل ارض وشايفن عم يحموني ، لو انت وخطوطك الحمر حول موظفينك الدرجة الأولى بالجمهورية بنيتو دولة وجيش ومؤسسات كانت قادرة تحمي لبنان كانو الحزب والحركة وكل التنظيمات المقا.ومة قعدو ببيوتن وارتاحو من هم كبير ، وكانو وفرو دم ترمل وتيتم وخسارة جنى العمر …
انتو رجال المارونية السياسية بنيتو دولة مزرعة وشعاركن قوة لبنان بضعفو وبقيتو على هل نغمة حتى قربنا نخسر لبنان …
مين مانعك يا سيادة البطرك انت وفريقك تستغل صداقاتك مع اميركا واوروبا والغرب والشرق ليتسلح الجيش ويصير قادر يحمي لبنان ؟
فكرك نحن بنكره نقعد ببيوتنا ونرتاح ؟
فكرك اولاد الجنوب حابين يروحو يقعدو بمناطقك بشقق قد علب السردين واجار الشقة بيبلش ب ١٠٠٠ $ ؟
يا حضرة ويا غبطة ويا نيافة ويا سعادة ويا سمو ويا سماحة البطريرك اطلع احكيلك موعظة ضد هل فتنجية اللي عم يفرقو اللبنانيين عن بعض ، وعم يستخدمو لغة كريهة بتشبه وجوهن المقرفة حتى يبقى لبنان …
الحرب بالنهاية بدها تخلص ، بس اذا ما صفينا النوايا اتجاه بعض كلبنانيين الحرب الاهلية بال ١٩٧٥ رح تصير مزحة بالنسبة للحرب الاهلية الجايي …
نحن شعب عندو كرامة وعنفوان ، واللي عم يتركو الجنوب ويهربو من الحرب هوذي نسوان واطفال مش رجال ولا مقاو.مين … ما تخلي اولادنا يكرهوا اولادك من ورا العنصرية …مش هذا هو دين المسيح … هذا دين القوات .
قلم حر
