كلمتين ونص : لا تق_تلوا الحسين مجددا ولكن في الزواريب الضيقة …

ما بدي اعرف مين بلش بالأول , ولا بدي اعرف مين اللي استفز ولا بدي اعرف مين اللي حمل السلاح واطلق النار ولا بدي اعرف مين اللي بلش يقول شيعة شيعة او ارمن ارمن …
ما بدي اعرف مين اللي تسبب بمشكل بالنبطية وادى لجرحى ولا المشكل اللي صار بخيمة معوض وادى لسفك دم ولا بدي اعرف شو سبب اشكال برج حمود واي طرف استفز الثاني …
ما بدي احكي بالمضافات الي بتعرقل حركة الناس بتنقلاتها ولا بدي احكي بالأكل والمي اللي بيروحو هدر ولا بالزأورة , ولا بدي احكي بالإنتقادات اللي ما بتقوم قيامتها الا لما تبلش عاشورا , ولا بأصحاب الأقلام اللي ما بتعرف تنتقد الا كل شي الو علاقة بعاشورا …
بس بدي اسأل كل الناس يا هل ترى الإمام الحسين بيرضى انو يصير اشكال بإسمو بين لبناني ولبناني , بين شيعي وشيعي , بين انسان وانسان ؟
مش اسرائيلي اللي عمل المشاكل , ولا يزيد , ولا ارهابي … نحن اللي اللي عملنا هذه المشاكل …
اللي افتعل المشكل بخيمة معوض هو عن جد مع الإمام الحسين ؟
اللي افتعل المشكل بالنبطية هو عن جد عم يخدم الإمام الحسين ؟
اللي افتعل المشكل ببرج حمود هو عن جد عم يبين مظلومية الإمام الحسين ؟
ليش هيك عم نعمل ببعض ؟
اللي كان يروح على خيمة معوض بعد عندو اطمئنان يروح من جديد ؟
ما تقتلو الحسين من جديد بكل زاروب وكل حي وكل شارع وكل قرية وكل مدينة …
ارحموا الإمام الحسين من انفعالاتكن اللي بعمرها ما بتخدم الفكر الحسيني ولا القضية الحسينية …
شوية وعي وكثير من المسامحة هوذ بس بيخدموا الإمام الحسين .
الإمام الحسين استشهد من اجل الإصلاح … كل واحد فينا يبلش يصلح بنفسو …
قلم حر